A miña aposta ía ser favorable á permanencia de Grecia no euro. Por moito discurso apocalíptico que atrone estes días, non haberá Grexit tras o referendo. Ben porque gañe o "Si", que parece o máis probable; pero tampouco se gaña o "Non". Téñoo tan claro, que pensaba facer a aposta en pesetas: en caso de perdela, seguramente me tocaría pagala na nosa vella moeda, xa que a saída de Grecia do euro desestabilizaría tanto o sistema monetario europeo que tarde ou cedo acabariamos volvendo á peseta.
 
A Grecia non a van botar porque non hai porta por onde saír, pero sobre todo porque ninguén vai arriscar o euro enteiro por uns poucos miles de millóns do non pagamento grego. Unha cantidade que para os gregos é un mundo, pero para o conxunto de Europa é solto. E aínda que hai quen asegura que o euro sobreviviría sen Grecia, os riscos son demasiado grandes, non é que te xogues unhas cadelas nunha casa de apostas senón poñer en perigo unha Europa que xa viviu demasiados sustos.
 
Levamos cinco anos xogando ao límite, ao bordo do precipicio pero só asomando un pé, resolvendo no último minuto en negociacións nocturnas. Esta vez foron un pouco máis alá, triplo salto mortal con rizo, pero tampouco haberá caída. Cinco anos tensando a corda, tanto que Tsipras pensou que é de goma, que non se rompe, e decidiu estirar todo o que lle dá o brazo. E non, non vai romper, aínda que Tsipras se pode levar un gomazo de rebote que o deixe fóra do goberno.
 
Por debaixo da xesticulación, todos en Europa saben que a débeda de Grecia é impagable, e que nalgún momento haberá que facerlle unha quita, ou polo menos un aprazamento. Recoñéceo o FMI, dino economistas de todas as cores, asumiuno Strauss Kahn nun recoñecemento dos erros cometidos. Unha quita á débeda de Grecia, e á doutros países, España incluída. Pero cambiar o paso non é tan doado cando levas un lustro instalado no dogma, así que hai que forcexar outro momentiño para que non pareza doado.
 
Grecia seguirá no euro o luns, aí deixo as mil pesetas. O que non apostaría é se haberá acordo definitivo en breve (débeda incluída), ou se Alemaña e compañía manterán unha tempada ao país en coma, cunha perna colgando do abismo e a poboación asfixiada, para rematar por convencer aos reticentes, castigar e humillar aos Tsipras e Varoufakis, e salvar o calendario electoral dos países endebedados e rescatados (España e Portugal van ás urnas en outono).