Situación económica
Época convulsa na universidade, os medios de comunicación arremeten contra política económica desenvolvida, semella que non se souberon facer os números. O caso é que sen transición pasamos do discurso da suficiencia, onde os problemas económicos tíñaos outra universidade, a estar no pozo, endebedados até as cellas e sen previsión de saída porque a solución pasa por endebedarse para facer fronte á situación, se agora non hai cartos para dar saída ao máis necesario, co pago da débeda e dos intereses que levará aparellado será imposible.

Contención
Malo cando a universidade ten que recorrer ao contencioso para dobregar á Xunta, cando un se mete nos xulgados sabe como entra pero non sabe como sairá, en todo caso non se pode pensar que se vai gañar, hai que prepararse para anos difíciles, o que parece claro é que Novaluce ten os días contados. Sexa quen sexa o reitor que saia das vindeiras eleccións aplicará a receita da “contención” e, por referencias externas e internas xa sabemos o que iso significa.

Reunións, correos electrónicos...
A actividade do reitor e equipo intentando contrarrestar o que se publica na prensa non deixa de ser chocante, se teñen razón, e non son quen para dicir o contrario, debería ser fácil manifestalo e que se entendera publicamente. Non me soa ben que as cousas estean desenvolvendo deste xeito.

Preocupada
Estou moi preocupada polo que está a suceder, son interina, a situación económica pode ter consecuencias nas plantillas, seguro que calquera cousa que pase terá como primeira consecuencia que desaparezamos dos postos de traballo, pasou na empresa privada, somos kleenex de usar e tirar en casos coma estes. Só vos pido que non sexades como o resto de sindicatos que viron como os traballadores nesta situación ían desaparecendo e non fixeron nada.