Os diferentes diarios de carácter local e das comunidades autónomas realizaron estudos para calcular o gasto que supón a chamada "volta ao cole" para as familias. A maioría móvense entre os 400 e os 800 euros, dependendo de en que comunidade se estude e se, ademais, hai algúns gastos "extra" como uniforme, taxas no colexio...
 
"A volta ao cole", polo tanto, supón desembolsar practicamente un soldo enteiro só en material escolar. Ata agora o gasto podía asumirse por distintos motivos. En primeiro lugar, tanto o Goberno central coma os gobernos autonómicos dispoñían dunha serie de axudas para as familias con menos recursos.
 
Segundo denuncia a propia CEAPA as axudas das Comunidades Autónomas reducíronse nun 75%. A iso hai que sumarlle a redución do 60% do Goberno central. Sen ir máis lonxe, no curso 2011-2012 case un millón de familias beneficiáronse destas axudas. Ao curso seguinte (curiosamente, o ano do primeiro gran tasazo) 396.000 familias recibiron estas axudas.
 
Por se iso fose pouco o prezo dos libros e do material escolar foi aumentando. Isto é debido, en primeiro lugar, ao aumento do IVE do material escolar ao 21% e tamén un incremento do IPC dos libros dun 2,3%.
 
Ante a falta de axudas e o incremento do gasto moitas familias optaban por crear os chamados "bancos de libros" onde son os propios particulares os que regalan os libros de cursos anteriores e, a cambio, poden acceder a libros de segunda man dos cursos que van iniciar de xeito totalmente gratuíto. Desgraciadamente, a entrada en vigor da LOMCE que obrigou a modificar 180 materias, impide esta práctica.
 
Xa se vén denunciando, dun tempo a esta parte, que as editoriais cambian cada pouco tempo (normalmente cada dous anos) o contido dos seus libros para obrigar as familias a adquirilos de novo. Normalmente eses cambios adoitaban ser pequenas modificacións como alterar a orde dos temas ou incluír algún apartado máis. Pero co cambio da Lei Orgánica que regula a educación de primaria e secundaria o cambio foi radical. Os cursos que xa aplican a LOMCE mandan os libros de texto do curso anterior ao cubo do lixo.
 
A realidade é que, xa sexa pola redución de axudas, o incremento do prezo dos libros ou a imposibilidade de pasar os libros dunha familia a outra (ou unha combinación de todas elas) é cada vez máis difícil afrontar estes gastos. Así, a CEAPA calculou que unha de cada tres familias non vai a poder afrontar os gastos que supoñen "a volta ao cole".
 
Esta situación supón outro ataque á educación e, especialmente, ao acceso á educación dunha parte da poboación. Neste caso non estamos a falar dun ataque directo ao acceso como pode supoñer a suba de taxas ou a eliminación de prazas.
 
Con esta situación aínda que os alumnos poidan acceder ao colexio ou ao instituto non van ter os materiais necesarios para poder afrontar con garantías as probas e exames. Iso supón non só outro xeito de expulsión senón que ademais vai constituír un elemento máis para construír un discurso en contra dos estudantes con recursos máis modestos. Pois sen libros ou con libros desactualizados os mozos non van poder aprobar ou terano moi difícil. Así, as estatísticas van mostrar que os nenos fillos de traballadores suspenden máis e obteñen peores cualificacións; un gran motivo para retirar bolsas e axudas.
 
Finalmente nesta cuestión escóndense grandes intereses económicos das editoriais. Como xa denunciou a CEAPA cando había diñeiro nas arcas públicas o Estado dedicouse a dar axudas para comprar libros en vez de fomentar bancos de libros de carácter público.
 
Ana Escauriaza