Así, a cobertura total do sistema de protección por desemprego situouse no 58,93%, fronte ao 60,45% dun ano atrás, o que supón un descenso da cobertura do 2,5%. É a taxa de cobertura máis baixa nun mes de agosto polo menos desde 2007.
 
Tamén baixan os gastos totais dos servizos públicos de emprego (antigo Inem) en prestacións de desemprego: en agosto o Estado gastouse 1.750,1 millóns de euros en prestacións, un 13,6% menos que en igual mes de 2014.
 
O gasto medio mensual por beneficiario, incluídas as cotizacións á Seguridade Social e excluíndo o subsidio agrario de Andalucía e Estremadura, situouse en 791,4 euros, o que tamén supón un descenso de 29,2 euros (-3,5%) sobre o mesmo mes do ano 2014.
 
A contía media bruta da prestación contributiva percibida por beneficiario alcanzou en agosto os 784,2 euros, cun descenso de 7,8 euros sobre o mesmo mes de 2014 (-1%).
 
Pero non todo isto é tan negro: o número de solicitudes de prestacións ascendeu en agosto a 598.591, o que representa un descenso do 6,6% respecto de igual mes de 2014.
 
De acordo cos datos do Ministerio, no oitavo mes do ano tramitáronse en total 585.059 altas, un 8% menos que en agosto de 2014. O prazo medio de recoñecemento da prestación foi de 1,9 días, un 27,5% por encima do de agosto de 2014.
 
Os datos de prestacións sempre van cun mes de atraso respecto das cifras de paro. Por iso, Emprego publicou este venres as cifras do gasto en desemprego de agosto de 2015 e os datos de paro de setembro.
 
Axencias