O investimento en educación universitaria supuña fai un lustro un 0,97% do Produto Interior Bruto (PIB), moi lonxe das cifras dos países europeos. Agora, ese investimento caeu e representa unicamente o 0,88% do PIB.
 
As universidades onde o recorte é máis aguilloado, segundo o informe, é a Politècnica de Catalunya, cun 26% menos de investimento, seguida da Internacional de Andalucía e a Politécnica de Cartaxena cun descenso do orzamento do 22,1% e do 21,7% respectivamente.
 
De maneira paralela, as universidades españolas están a ver un descenso notable do número de alumnos. Desde o curso 2011/2012, segundo os datos feitos públicos polo Ministerio de Educación, hai 77.000 estudantes menos nas universidades públicas.
 
Esta situación débese ao “aumento de taxas e a diminución de bolsas e axudas, o que provoca que moitos mozos renuncien a iniciar estudos universitarios ou deban abandonalos ao non ter capacidade económica para facer fronte ao prezo das matrículas”.
 
As cifras son alarmantes. No curso 2011/2012 outorgáronse 1.618 millóns de euros en bolsas das que se beneficiaron 793.949 persoas. Segundo as estimacións o curso pasado déronse 1.410 millóns de euros, dos que se beneficiaron 757.027 estudantes.
 
Finalmente, o informe tamén denuncia que durante o últimos tres anos “os recortes seguíronse cebando coa universidade pública, que, lonxe de beneficiarse da incipiente recuperación económica, segue reducindo o seu persoal a un ritmo preocupante”.
 
De feito, apuntan a que entre 2012 e 2015 perdéronse 7.766 postos de traballo, o que representa unha diminución do 5,1 % do profesorado e do 4,9 % do persoal de administración e servizos.
 
Fonte; A Marea.
Menea e vencerás...