A pesar da cancelación das concesións "Emilita", "Cidade de Landró" e "Cida de Masma" (códigos 1221, 1454 e 1455 respectivamente), que supoñían o eixo esencial do plan mineiro canadense, a Plataforma pídelle á Xunta un avance significativo na reforma da Lei 3/2008, de Ordenación da Minería de Galicia, actualizada o pasado exercicio para cambiar a normativa de caducidade dos dereitos mineiros pero en absoluto modificada nos seus termos esenciais, como son a plena vixencia do Plan Sectorial de Actividades Extractivas (PSAEG) e o emprego de reactivos químicos de alta toxicidade coma o cianuro de sodio no proceso de recuperación do mineral.
 
De feito, nos artigos 11 e 12 da actual lei mineira 3/2008, ao PSAEG atribúenselle plenos poderes que chegan a prevalecer mesmo sobre os plans urbanísticos de zona ao incluirse o concepto de "máxima simplificación administrativa na tramitación dos expedientes mineiros", establecendo unha clara preeminencia da actividade mineira por riba doutros sectores produtivos e dando de facto vía libre a un proceso liberalizador ao primar sobre o público criterios empresariais e económicos. Neste contexto, un novo proxecto mineiro en Corcoesto non só é posible senón mesmo probable cando a evolución económica permita un prezo á alza das materias primas que fagan rendible a súa explotación.
 
Doutra banda, a normativa actual toma como referencia en determinados momentos a Lei 22/1973, de Minas, unha norma preconstitucional elaborada nunha época cuxas esixencias ambientais difiren moito das actuais. Recalca, ademáis, a obriga de restauración dos terreos afectados por proxectos mineiros, pero obvia claramente a necesidade de que as empresas do sector constitúan garantías financieiras suficientes que poidan certificar o pago dos custos xerados por eventuais accidentes mineiros a gran escala.
 
A CLAVE É A ACTUALIZACIÓN DA LEI
 
A reforma da mencionada Lei 3/2008, aprobada na época do Bipartito cando Fernando Blanco (BNG) era Conselleiro de Industria é a clave para que conflitos mineiros coma o de Corcoesto non volvan a repetirse. Por iso en ningún caso deberíase afrontar á situación cunha actitude triunfalista mentres non se produza un cambio significativo na norma. A de Corcoesto foi unha primeira gran batalla gañada pola cidadanía e os movementos sociais pero sería un erro pensar que o problema queda descartado de maneira permanente.
 
AGRADECEMENTOS
 
Finalmente, e tal como fixo constar a asociación en outubro de 2013, logo do anuncio de cancelación do proxecto de Edgewater por parte da Xunta a Plataforma desaxa agradecer, sen patrimonializar en ningún caso a loita social, a colaboración de todas aquelas personas e institucións que fixeron posible que, de momento, a reapertura da mina de ouro de Corcoesto non sexa unha realidade.
 
PLATAFORMA SALVEMOS CABANA