“Continúa o espolio da vivenda que debería ser nosa, dos cidadáns, pagada con diñeiro de todas pero utilizada para especular e enriquecer a uns poucos”, denuncia a PAH, que na web da campaña fixo público un mapa coa localización de 30.000 destas vivendas en todo o territorio español xunto ao manual “Obra social a PAH”, no que se explica ás familias como ocupar os inmobles baleiros, individual ou colectivamente, e as súas implicacións legais.
 
A PAH acusa así á SAREB de “actuar coma se dunha mafia se tratase, con total impunidade e sen respectar os dereitos humanos” e esíxelle unha “mobilización urxente” para que “a vivenda responda á súa función social”. A resposta da SAREB foi, con todo, moi diferente.
 
Tan só un día despois do lanzamento da campaña, a SAREB limitouse a enviar un requirimento notarial á PAH ameazando con emprender “todas as accións legais pertinentes” se no prazo de 24 horas non modifica o deseño da páxina web da campaña, xa que, segundo SAREB, xera unha “confusión coa páxina web orixinal” do organismo oficial. Ademais, a SAREB acusa á PAH de “incitar á ocupación das vivendas”, o que podería ser constitutivo de varias infraccións penais ademais dun delito contra a propiedade intelectual.
 
Nun comunicado, a PAH mostrouse de acordo en modificar a aparencia da web “da SAREB é nosa” porque, afirman, nunca quixeron parecerse ao ‘Banco Malo’, pero rexeitan a retirada do mapeo e do manual, xa que o primeiro “serve como material de difusión para visibilizar unha pequena parte da extensión e cantidade da vivenda que foi rescatada con diñeiro público” e o segundo “leva anos colgado na web da PAH”.
 
A PAH insiste en que a súa intención, xa que a SAREB é 45% pública e as súas vivendas “foron rescatadas pola xente do montón”, é a de “denunciar o paradoxo que estamos a vivir, e pedir que esa vivenda teña un uso social para a cidadanía e non para a especulación financeira”. “Se a SAREB quere que lles deixemos en paz teno moi fácil: só ten que ceder as vivendas baleiras pagas co diñeiro de todas a quen as necesitamos. Se a súa resposta é a ameaza, que saiba que non temos medo, a Obra Social é xusta e lexítima e imos seguir adiante gritando aínda máis alto que #LaSarebesNuestra”, apostila a plataforma.
 
Comunicado da PAH “A SAREB é nosa”
 
Como ben sabemos todas, a burbulla inmobiliaria estalou en 2008. Aínda que o goberno dicía que tiñamos «o sistema financeiro máis sólido da comunidade internacional», pronto se fixeron visibles as gretas.
 
Entre 2010 e 2012, o estado español inxectou máis de 61 mil millóns de euros de diñeiro público – do noso diñeiro – para rescatar á banca. Tiñamos 45 caixas de aforros e 8 bancos antes da crise. Agora, despois de fusións e reestruturacións, temos 2 caixas de aforros e 15 bancos.
 
O resultado foi unha concentración de capital en mans de poucos. O obxectivo principal da nacionalización de varias entidades – Catalunya Caixa, Bankia, Unnim, Nova Caixa Galicia, Banco de Valencia – non foi o ben común ou o beneficio dos cidadáns se non o beneficio da banca.
 
Por exemplo, despois do rescate vimos como BBVA comprou a Unnim por un euro en 2011, e A Caixa quedou co Banco de Valencia polo mesmo prezo en 2012. O roubo segue ata hoxe. Coa venda de Catalunya Caixa a BBVA perdemos 12.000 millóns de euros. E estamos á espera de ver o que perderemos coa venda de Bankia.
 
Noutras palabras: grazas ao peto da cidadanía, os ricos están a facerse máis ricos, mentres que nós, a xente do montón, vivimos a austeridade, os recortes e os desafiuzamentos, entre outros males, para asegurar que paguemos nós polo rescate.
 
As perdas son de todos, e as ganancias de moi, moi poucos.
 
Parte do proceso de “limpar” ou “sanear” o sistema financeiro foi a creación da Sareb. A Sareb é coñecida como o banco malo, pero en realidade é unha inmobiliaria de “activos tóxicos” cos refugallos da burbulla inmobiliaria, das entidades rescatadas con diñeiro público. Estes “activos tóxicos” son vivendas acabadas ou medio acabadas sen vender e a débeda de promotores e construtoras erradas.
 
Con máis de 106.000 propiedades, a Sareb é a inmobiliaria máis grande de Europa. Encima, é unha entidade que é 45% pública mentres o outro 55% é das entidades rescatadas (polo que a maior parte do seu diñeiro tamén é de todas). Pero no canto de garantir o dereito á vivenda para centos de miles de cidadáns que se atopan na rúa, o seu obxectivo é vender os seus activos cun 15% de beneficio antes de 2027.
 
Grazas á presión cidadá, a Sareb cedeu 2.000 vivendas ás comunidades autónomas en 2014. Pero dicimos que é demasiado tarde, e sobre todo demasiado pouco. 2.000 vivendas só son o 2% de todas as vivendas que teñen.
 
Querémolas todas!
 
No canto de rescatar á xente, rescatouse á banca co noso diñeiro. Estamos a sufrir recortes en educación, sanidade e outros servizos públicos para asegurar o pago do rescate.
 
Denunciamos isto como un espolio, e con este obxectivo lanzamos a campaña “a Sareb é Nosa”, para retomar o que é noso.
 
Ante esta situación, a campaña da Obra Social da PAH baséase na mobilización e autoorganización, sendo conscientes que só organizadas e con apoio mutuo podemos plantar cara á inxustiza que supón a acumulacións de vivenda baleira xunto co drama dos desafiuzamentos, recuperado así esas vivendas que son nosas e que a banca coa inseparable axuda do goberno nos arrebatou. Reacollemos ata o momento a unhas 3.000 persoas e recuperamos preto de 40 edificios, dos que 18 son propiedade da Sareb, que ademais se nega a escoitar ás familias que vivien neles.
 
Destes bloques case 40 bloques contamos con importantes vitorias, os dous casos máis evidentes, as cesións da Sareb á Generalitat do Bloc Grazcia ( Sabadell ) e o Bloc Bages 2 ( Manresa). Os dous bloques están en proceso de asinar contratos de aluguer social para 3 anos para as familias que os están ocupando, 40 no Bloc Gracia e 17 no Bloc Bages 2. Vitorias sen precedentes que nos axudan a seguir sabendo que SI, PÓDESE.
 
A PAH utilizou todas as vías posibles. 136 Concellos de Catalunya aprobaron a Moción da Pah para multar aos Bancos que acumulan vivenda baleira e non lle dan a ela un uso social, e en xuño o Parlament de Catalunya aprobou a ILP das Pahs Catalás, onde tamén se esixe a mobilización da vivenda valeira para un uso social. Agora coas Esixencias PAH interpelamos aos partidos para que aproben unha lei que dunha vez por todas acabe con esta inxustiza. E agora, ademais, interpelamos á SAREB e os seus responsables políticos e económicos a que nos escoiten e cedan ás persoas, a quen xa as pagamos, as vivendas baleiras como mostra o mapa teñen por todo o territorio español.
 
Esiximos aos grandes propietarios de vivenda, en particular á SAREB, valeira a súa mobilización urxente e que a vivenda responda basicamente á súa función social, é imposible entender que despois dos miles de millóns de rescate publico á banca, esta siga maltratando ás persoas que necesitan unha resposta habitacional, é inadmisible que a SAREB siga actuando coma se dunha mafia se tratase, con total impunidade e sen respectar os dereitos humanos.
 
Por iso hoxe lanzamos a campaña a Sareb é Nosa. Nesta campaña facemos publica a páxina web: www.lasarebesnuestra.com. Nela mapeamos unhas 30.000 vivendas da Sareb usando información das immobiliarias que xestionan os seus activos unha boa parte de vivendas da Sareb. Mentres non vemos indicio de resposta por parte da Sareb nin a banca en xeral, cremos que é a nosa obligacion compartir as nosas ferramentas, para que sexa a xente organizada quen de resposta a esta situación.
 
As catro entidades que xestionan os activos da Sareb, tres delas fondos de investimento norteamericanas, estanse a beneficiar directamente do rescate á banca, mentres que nós, a xente do común, pagamos a conta. E mentres que sufrimos máis de medio millón de execucións hipotecarias e centos de miles de desafiuzamentos, menos que o 2% do parque inmobiliario no estado español esta dedicado á vivenda social.
 
Considerando que xa o pagamos os cidadáns, esiximos que a vivenda da Sareb sirva NON para a especulación senón para que viva a xente. Basta de especulación, queremos vivenda digna para todas. Un parque de vivenda en mans da cidadanía, con alugueres estables e alcanzables.
 
Estas son as 22.000 casas valeiras que o chamado "Banco malo" teme que se okupen