O proceso de asembleas e votación fixérase con certa premura coa finalidade de que se puidese levar a aprobación no Consello de Goberno previsto para o día 27 de novembro. O día 16 deste mes, a representación do PAS nese órgano colexiado, recibiu unha comunicación na que se anulaba a reunión fixada para o día 27 de novembro trasladándoa para o día 16 de decembro (mércores). Informada desta circunstancia, a Xunta de Persoal decide, por unanimidade, solicitar ao xerente e ao reitor a sinatura do acordo para, como sinalamos anteriormente, asegurar a súa eficacia ao non facelo depender das eleccións a reitor que se realizarán o vindeiro día 3 de decembro.
 
Insistimos en sinalar que o acordado remata, a nivel de RPT, o proceso de integración dos postos de traballo funcionarizados convertendo, organizativamente, ao PAS desta universidade nun corpo único no que aínda faltan moitos obxectivos por acadar, o máis importante, ao noso xeito de ver e polo que levamos anos loitando no que até agora era PAS laboral, non é outro que a verdadeira profesionalización da xestión que asegure o funcionamento dos servizos sen a presenza de PDI. Non esquecemos outros importantísimos propósitos que agardan a súa consecución como son o catálogo de funcións que, entre outras cousas permitirá adecuar a formación ás necesidades de cada posto de traballo, o manual de procedementos...
 
Neste camiño contamos coa participación de todas e todos.
 
Documento asinado polo reitor, todas as centrais sindicais, agrupación electoral e pte. da Xunta de Persoal.