Que a candidatura de Daniel Pena, e o seu equipo, represente a alternativa política que sinalamos con anterioridade xa lle resta a posibilidade de recoller o voto que non coincida co seu espectro ideolóxico. Os sectores de voto máis progresista (historicamente alumnos e PAS) situáronse claramente en contra. Despois dos recortes impostos pola dereita política non é de estrañar que se vote en consecuencia.
 
Do reconto cabe salientar o alto número de votos en branco no sector do PAS, sinal do descontento, por unha parte coa traxectoria do actual goberno e por outra banda, do rexeitamento ao grupo que se presentaba como alternativa. Tamén constatamos, no colectivo de Persoal de Administración e Servizos un alto número de traballadoras e traballadores que, por temor a que puidese gañar a candidatura da dereita, optaron por votar a Julio Abalde como “mal menor”.

 
Para o PAS, o contexto que se consolidou coa votación realizada o día 3 de decembro, e aínda coa sinatura dos acordos previos ás eleccións, non está baleiro de incertezas. O equipo reitoral que tomará posesión proximamente ten que levar a efecto o acordado, ten que desfacerse do tufo electoralista que poidan aparentar os compromisos adquiridos durante a campaña demostrando, na práctica, o seu compromiso.
 
Por outra parte é a obriga do PAS velar porque o comprometido se cumpra non permitindo ningún retraso no calendario acordado.