Como en edicións anteriores a presentación tivo lugar en primeiro lugar, facendo unha análise cuantitativa das situacións nas que se produciu algún tipo de violencia institucional sobre persoas baixo custodia dos funcionarios de seguridade pública (en comisarías, cuarteis, prisións ou outros centros de privación de liberdade) e/ou no transcurso de intervencións policiais (represión de manifestacións, etc.). Esta análise dos datos desenvolveuse segundo o territorio no que se produciron os feitos, sendo Catalunya, Andalucía e Madrid os tres territorios que recompilaron máis denuncias (afectando a 277, 221 e 144 persoas respectivamente).
 
         A continuación analizáronse os datos segundo as características das persoas agredidas e, neste ámbito, dous colectivos especialmente afectados: as persoas agredidas durante a súa participación en mobilizacións sociais (con polo menos 450 persoas afectadas) e as persoas migrantes (355 persoas). Continuando coa descrición do corpo funcionarial denunciado por cometer as agresións, destácanse, segundo os datos a Policía Nacional (denunciada por 315 persoas), as policías autonómicas (denunciada por 272 persoas) e a Garda Civil (denunciada por 271 persoas).
 
        Posteriormente e tras analizar os datos coñecidos, pasouse a presentar un estudo cualitativo, dunha forma máis detallada, dalgunhas situacións específicas que, segundo destacou a CPDT, xeran especial preocupación, empezando polas mortes baixo custodia, das que indican coñecer 50 casos, e seguindo pola situación das persoas migrantes; especialmente na Fronteira Sur e os voos de deportación.
 
     “Destacamos estas tres cuestiones por entender que son as de maior gravidade de entre as ocorridas no período analizado, pero sabendo que non son as únicas e que todas as situacións coñecidas son preocupantes, por implicar a vulneración de dereitos fundamentais como o son o dereito á integridade física, psíquica e moral” comentan desde a propia Coordinadora.