Comunicado da convocatoria á concentración
 
Recentemente en Galicia comunicáronse á poboación importantes alertas sanitarias de tipo ambiental, como foron o declarar a auga de Ferrol non apta para o consumo ou o abrocho de Lexionelose en Lugo.
 
Estas alertas sanitarias, puxeron de manifesto a incapacidade da Consellería de Sanidade para xestionar estas situacións de crise debido, principalmente, a unha falta de medios e a unha deficiente organización dos servizos de inspección.
 
Os Farmaceúticos Inspectores de Saude Pública de Galicia (FISP) dependentes da Consellería de Sanidade, queremos subliñar que estas alertas sanitarias, as de Ferrol e Lugo, non son feitos illados. Na nosa Comunidade Autónoma prodúcense con frecuencia numerosas situacións que poderían desencadear alertas similares. Habitualmente detéctanse incumprimentos nas augas de consumo municipais que fan que a auga sexa “non apta para o consumo” nalgúns casos. Séguese detectando Legionella en hospitais, centros deportivos, residencias da terceira idade ou colexios, e continuamente xéranse alertas por produtos químicos de uso cotián que supoñen un risco directo para a saúde dos consumidores.
 
En Galicia, cada ano aumentan os casos de enfermidades relacionadas coa saúde ambiental debido ao escaso número de inspectores existentes e á falta de medios, resultando imposible abarcar a totalidade das instalacións para inspeccionar (9.211 establecementos segundo a memoria publicada en 2014 pola Consellería de Sanidade).
 
Outro aspecto fundamental que evidencia a desorganización do corpo de farmacéuticos inspectores é a ausencia de vixilancia sanitaria fora do horario laboral destes, xa que non existen quendas de garda que cubran calquera alerta sanitaria que xurda durante as tardes ou os fins de semana.
 
Ante a proposta de que exista unha estrutura adecuada de inspección cunha mellor organización e maiores recursos, a Conselleria de Sanidade, incriblemente, pretende reducir o número de inspeccións a realizar, e o número de inspectores, a pesar de que con iso aumenta o risco sanitario para a poboación.
 
Así, a Consellería de Sanidade, reduciu drasticamente o número de inspeccións e de análises realizadas polos inspectores desde o ano 2009, en aspectos tan fundamentais como os abastecementos de auga municipais ou de colexios, piscinas, control da lexionelose, produtos químicos ou biocidas.
 
O próximo día 10 de decembro ás 11h, os Farmaceúticos Inspectores de Saúde Pública manifestarémonos ante a Conselleria de Sanidade, en Santiago de Compostela, para reclamar unha maior responsabilidade sanitaria que evite riscos innecesarios para saúde da poboación.