Maldita vida
O peor sempre sucede, as leis de Murphy lévanse a efecto día a día. O día 3 de decembro votamos ao novo reitor, moitos decidimos pensando non nas boas condicións do sr. Abalde para exercer o cargo, foi determinante para optar pola súa candidatura o medo a que gañara a candidatura da oposición, non por que coñeceramos a Daniel Pena, senón porque pensabamos que “perigaban” os acordos acadados con este equipo. Intuíamos, ao mesmo tempo, que, de gañar a candidatura da “dereita” perigaban os regulamentos e normativas que custara tanto acadar primeiro con Barja, despois con Armesto. Pero como todo o que pode saír mal, sae mal, o equipo que se postulaba como defensor da regulamentación nas relacións cos traballadores, incumpre coa prórroga das comisións de servizo o que eles mesmos asinaran. Quédanos a cara de tontos porque realmente nos tomaron o pelo... unha vez máis.

Inocentes
O 23 de decembro o xerente decidiu adiantar o día dos inocentes (habitualmente celebrada o día 28) remitindo ao persoal afectado (non se colgou na páxina da universidade) a resolución pola que prorrogaba as comisións de servizo do persoal funcionarizado. Con esta decisión como con case todas as decisións que se toman desde postos como o do xerente favorécense os intereses dun número moi limitado de traballadores e dáselle unha patada ao resto e, de paso, á Resolución da Xerencia 1/2014, do 9 de xullo de 2014, pola que se ditan instrucións para a cobertura temporal de postos de traballo de PAS funcionario en comisións de servizos.