Trátase do espolio de diñeiro público rexistrado durante anos na construción duns 200 colexios e institutos na Comunidade Valenciana. Unha auténtica estafa institucional que foi cifrada en máis de mil millóns de euros en sobrecustos pagados por Ciegsa, a empresa pública creada no ano 2000 para a construción de colexios públicos.
 
A Garda Civil irrompeu o martes na sede desta empresa e fíxose con todos os correos electrónicos, tanto corporativos como particulares, de Máximo Caturla, quen foi xerente entre 2004 e 2007 e un dos detido na redada do martes.
 
A denuncia que Esquerra Unida levou ao fiscal e que deu orixe ao caso Imelsa, xerme da trama de corrupción investigada, contiña gravacións a Caturla durante a súa etapa en Ciegsa nas que se falaba da súa presunta participación nas mordidas.
 
A Consellaría de Educación deu a coñecer recentemente un informe elaborado pola Intervención da Generalitat que sería a proba deste saqueo. En cifras, a Intervención conclúe que Ciegsa pagou o metro cadrado dos colexios coma se fosen vivendas: a 912 euros fronte aos 670 euros que debían custar. E de aí o mil millóns en sobrecustos.
 
Un malgasto de diñeiro que, en palabras dos novos dirixentes o goberno valenciano, minguou gravemente a posibilidade de construír máis colexios e acabar cos eternos barracóns que durante anos estiveron no foco das críticas da comunidade educativa.
 
A Generalitat gastou 92 millóns de euros en aulas prefabricadas desde 2001. Nestes barracóns, que deberían ser provisionais, eternizáronse durante anos e miles de escolares da Comunidade Valenciana vense obrigados a estudar neles á espera duns colexios que nunca chegan.
 
El Ventano