Mentres que os cartos dos patriotas: políticos, empresarios, membros da casa real... buscan acubillo nos paraísos fiscais, SICAVS... á clase traballadora condénaselle a sacar ao país dunha crise que ten a súa orixe na cobiza capitalista reflectida na burbulla inmobiliaria á que seguiu o rescate bancario... As políticas neoliberais transformaron esa débeda privada en débeda pública que pagamos toda a cidadanía ademais de coa precarización laboral, paro... coa descapitalización dos servizos públicos pois os diñeiros que deberían ser destinados a sufragar as súas necesidades empréganse no pago desa enorme débeda que esa clase política ao servizo dos poderosos nos fixo contraer.
 
Así viñeron os recortes, tanto na administración como aos seus traballadores e traballadoras, recortes salariais (Zapatero, Rajoy, Feijoo), recortes que, en época electoral se nos devolven a contagotas para que teñan un efecto sedante e votemos, unha vez máis, aos culpables da perda do noso poder adquisitivo, dos que recortan os nosos postos de traballo, as prestacións sociais, as nosas xubilacións...
 
Rajoy que sabe que se aproximan novas eleccións acorda, dun día para outro, a devolución do diñeiro no mes de abril, Feijoo que sabe que as eleccións autonómicas serán despois do verán adopta o acordo de facer a devolución en dous cómodos prazos, un no mes de abril e outro no mes de setembro, xa próximo ao que terán lugar as eleccións galegas. Todo atado e ben atado. La Voz de Galicia, publicou un gráfico no que se reflicte esa relación entre devolucións e convocatorias electorais.
 
Reclamámoslle á Xunta de Galiza que deixe ao maxe os cálculos electorais e restitúa ás traballadoras e traballadores da Administración Autonómmica todo o recortado nos últimos anos.