–Como valora a decisión do xuíz de citar a declarar a dous altos cargos do Sergas?
 
–É algo fabuloso, boísimo, sobre todo para os cidadáns que ven como a xustiza está a investigar como se negaron e atrasaron tratamentos a enfermos de hepatite C.
 
–Por que denunciaron?
 
–Sae dos profesionais médicos porque os familiares estaban esnaquizados. Pediamos os fármacos e nin sequera nos contestaban. Ata o propio laboratorio dábache o OK en 24 horas e a Xunta demorábase ata sete meses. Nun caso cando chamamos a un doente, da provincia de Pontevedra, para informarlle de que finalmente tiñamos a autorización do Sergas, resulta que levaba morto unha semana. Deixouse morrer a enfermos por razóns económicas.

–A Xunta négao. Di que só aplicaron criterios médicos...
 
–Mente descaradamente. Falta á verdade. Había enfermos moi graves e chegamos a enviar ata tres peticións para que autorizasen o tratamento. Houbo un caso no que mesmo remitimos unha carta directamente á conselleira advertíndolle que se non fornecía o fármaco tería que cargar coa morte do paciente e levariámola aos tribunais e tivo efecto porque finalmente autorizáronllo e salvouse.
 
–Cre que deben dimitir estes dous altos cargos?
 
–Claro e hai que depurar responsabilidades a nivel político. O que sucedeu non ten nome. Se eu como médico négome a fornecer un fármaco e cústalle a vida ao meu paciente termino no cárcere. Aquí pasou algo anormal, moi grave. Non se pode volver repetir nin aquí nin en ningún país do mundo e para iso debe haber un castigo exemplar. Os culpables teñen que pagar.
 
La Opinión Coruña
 
Unha carta de tres médicos á Xunta librou da morte a un doente con hepatite