Informe do reitor
O reitor informa da reunión do Consello Galego de Universidades do día 8 de xuño no que se acordou a conxelación das taxas. No que afecta á UDC, autorizáronse 4 mestrados novos que se porán en marcha no vindeiro curso, dúas titulacións recibiron, tamén, informe favorable.
 
Informa da asemblea da CRUE realizada o día 23 de xuño, que tiña como punto importante da orde do día a Aprobación se proceder de graos 3+2. A asemblea ratificou e decidiu, unha vez máis, facer vinculante a moratoria acordada na Asemblea Xeral do 2 de febreiro de 2015 e non impartir graos de tres anos de titulacións xa existentes ata o curso 2017/2018.
 
Para definir que titulacións son novas e cales non, tomarase como referencia o Catálogo de títulos universitarios pre-Boloña, publicado polo Ministerio de Educación, Cultura e Deporte, e entenderase que todo grao que teña o mesmo nome que algún dos que apareza no devandito catálogo, non poderá considerarse como novo. Todo o que estea fóra del, considerarase grao de nova creación. Para aqueles graos nos que exista algunha dúbida, a Asemblea Xeral decidiu que sexa o Comité Permanente da CRUE, xunto coa universidade en cuestión, quen estude cada caso de forma individual e dilucide se, efectivamente, se trata dun de nova creación ou se xa existía nas titulacións pre-Boloña. En total presentáronse 11 titulacións (8 de universidades privadas 3 de universidades públicas) que serán analizadas porque aínda que a denominación sexa diferente ás das titulacións pre-Boloña parece que os contidos poden corresponderse coas pre-Boloña. Por este motivo o punto sinalado retirouse da orde do día.
 
Informa da posta en marcha do Campus Industrial de Ferrol, campus estratéxico tanto para a universidade como para a cidade que xa recibiu financiamento para este ano e para o vindeiro. Ten unha gobernanza e persoal específico.
 
Xerente
Sobre a Oferta de Emprego Público de Persoal de Administración e Servizos, informa que desde a reunión do Consello de Goberno anterior no que xa se informara deste asunto, realizouse outra reunión da comisión negociadora na que se presentou outra proposta que abranguería o período 2016-2020 na que se recolle que só un máximo do 25% das prazas das OEP correspondentes á quenda libre se reservarían a grupos A1 e A2. Con data de onte, día 27, recibiuse unha comunicación na que a Xunta de Persoal manifestaba o seu rexeitamento, sinala que os sindicatos UGT e CCOO aceptaron dita proposta.
A pesar, do rexeitamento en aras a non dilatar o proceso iniciaranse os trámites coa Xunta de Galicia para traela para a súa aprobación no vindeiro Consello de Goberno.
Informa do cesamento da vicexerenta de Ferrol.
Informa do acordo dos sindicatos CSIF, CCOO e UGT coa Xunta de Galiza para a devolución da parte devindicada da extra de 2013 que afectará, tamén, á UDC.
 
Punto 14 .- Quenda aberta de intervencións:
 
Manuela Pinazas:
Informa do acordo maioritario alcanzado na Xunta de Persoal do día 27 polo que se rexeita a proposta da Xerencia e Reitoría. Le o acordo de xeito literal para que conste na acta. O secretario xeral solicita se lle transmita por correo electrónico. O acordo sinala que:
 
A Xunta de Persoal na súa reunión do 27 de xuño de 2016 acordou por maioría rexeitar a proposta da Oferta de Emprego Público (OEP) de 2016 no que se refire ás prazas reservadas para quenda libre presentada pola Xerencia, porque:

• ·    Cambia a filosofía dun xeito radical, xa que, cando se negociou o barrado das prazas era coa finalidade de que todas elas saíran a promoción interna seguindo o modelo da escala xeral.
  

• ·     A reserva de prazas dos grupos máis altos para quenda libre supón un grave prexuízo para o persoal e a súa carreira profesional, sentando un perigoso precedente.
  

• ·     Incumpre o acordado cando se negociou a OEP de 2015, na que se estableceu que na seguinte oferta as prazas serían todas de postos base da escala xeral.
  

• ·     Incumpre o acordado para os promocións xa que non se ofertan todas as prazas acordadas na escala de bibliotecas no 2016, e nas seguintes ofertas poderán reservar aquelas que máis lles interesen de calquera outra escala.
  

• ·     Revela unha contradición da Xerencia, posto que as persoas que lle serven para ocupar postos en comisións de servizos non lle son válidas para obter o posto mediante concurso.
  

• ·     Ademais, economicamente non se sostén a proposta da Xerencia xa que supón un maior custo para a Universidade.