A tendencia, di o organismo, consolidouse nas dúas últimas décadas: nos países desenvolvidos as persoas novas substituíron ás maiores como o grupo de poboación con máis risco de caer na pobreza. A situación trasládase ao mercado laboral, onde agora son os mozos os que máis probabilidades teñen de estar en peores condicións que os adultos.
 
A que se debe este aumento da pobreza laboral xuvenil? A OIT apunta á temporalidade e á incidencia do emprego a tempo parcial, que os mozos sofren con máis frecuencia que outros grupos de idade. A mala calidade do emprego, di o organismo, segue afectando “de forma desproporcionada” aos mozos.
 
“Estas formas de emprego adoitan estar asociadas a salarios máis baixos, a un acceso limitado á formación, promoción laboral lenta e menores niveis de protección social, todo iso combinado mina as perspectivas da mocidade no mercado laboral e o seu potencial de ingresos”, explica o informe.
 
Nalgúns casos concretos, o traballo temporal ou a tempo parcial pode servir como ponte para chegar a mellores empregos e soldos. Con todo, a OIT recalca que a evidencia mostra que en moitos países este tipo de traballos non melloran as posibilidades dos mozos de conseguir un posto indefinido e a tempo completo.
 
España tamén lidera, xunto con Chipre, Eslovaquia e Romanía o grupo de países onde máis moz@s teñen un contrato temporal sen desexalo: o 80%. No caso do emprego a tempo parcial, son os italianos e romaneses os que teñen un destes traballos sen desexalo (un 70%), unha taxa que alcanza ao 60% dos empregad@s moz@s a tempo parcial españois.
 
A foto que resulta destas dúas cifras é que @s moz@s españois teñen de forma involuntaria un emprego precario (non para compatibilizalo con outras actividades como os estudos).
 
Difícil atopar un emprego
 
España é, ademais, un dos países do mundo onde é máis difícil para a mocidade atopar un emprego en 2016. No mapa elaborado pola OIT, España aparece xunto a Grecia e Italia, e no mesmo nivel que Iraq, Namibia ou Sudáfrica. En todos estes países máis do 35% dos mozos que buscan traballo non o atopan.
 
Outro récord que tamén bate España é o dos mozos que nin teñen traballo nin están a se formar. Xunto a Grecia e Italia é un dos países desenvolvidos onde o número dos chamados ‘nin-nin' é máis elevado: preto do 30% de mozos atópase nesta situación.
 
Para a OIT, este é un indicador relevante que mostra ata que punto os países se enfrontan a retos complexos que teñen que ver co mercado laboral, como a falta de formación, o abandono escolar temperán ou o efecto desánimo á hora de buscar un emprego.
 
En España a taxa de paro entre os mozos de entre 16 e 25 anos que buscan traballo en xuño era do 45,8%, só superado por Grecia que roza o 50%.

El Diario