Diante da inacción do equipo de goberno varias alumnas e alumnos do Máster de Igualdade, Xénero e Educación, realizaron unha protesta que consistiu en asistir á clase co torso espido. Agora a Reitoría toma unha decisión inaceptable, por un lado impón unha sanción de dous meses de emprego e soldo ao docente por outra banda abre expediente @s alumn@s que realizaron a protesta o que pode significarlles a perda da matrícula. @s alumn@s afectadas pásannos unha folla de sinaturas para reclamar o peche inmediato do expediente.
 
Reproducimos o texto e xuntamos a folla de sinaturas,
 
Campaña “Eu tamén son Teteiro Ceive”
 
O pasado mes de febreiro, o profesor Luciano Méndez Naya da USC proferiu repetidos comentarios machistas contra unha alumna, diante dela e do resto do alumnado, chegando incluso a ameazala. Posteriormente, reafirmouse no seu discurso sexista en dous artigos publicados en La Voz de Galicia.
 
A alumna, acompañada doutrxs compañeirxs, presentou unha denuncia ante a USC, que non tomou máis medidas que abrir unha investigación e, ante a mediatización do caso, aceptar a petición de cambio de clase que a alumna solicitara e lle fora denegada nun primeiro momento.
 
O 17 de marzo, un grupo do alumnado do Máster de Igualdade, Xénero e Educación asistiu a unha clase súa, quedándose en suxeitador para reivindicar o dereito a non ser discriminadas pola vestimenta nin polo xénero, para poder facerse oír publicamente e para loitar contra a inacción da USC.
 
Unha vez a acción saíu en prensa, a USC anunciou a apertura dun expediente disciplinario ao profesor Luciano Méndez. A finais de xullo, a USC imponlle unha sanción de dous meses de suspensión de emprego e soldo. Porén, mantenlle as mesmas horas de docencia, a pesar das súas declaracións públicas tales como: "A testosterona é unha hormona complicada, pode ser unha aliada que estimule e motive e pode ser tamén o peor dos inimigos, que faga o varón vulnerable e débil. Controlala, manexala en beneficio propio é labor de toda unha vida.".
 
Ademais, aproveitando o mes de agosto, a USC abre un expediente disciplinario contra o alumnado do Máster de Igualdade, Xénero e Educación que denunciou esta situación, considerando a reivindicación dunha educación libre de sexismo como posible constitutiva dunha falta leve que pode levar consigo ata a perda de matrícula.
 
Consideramos que o primeiro requisito para que se dea unha verdadeira “calidade docente” responde á transmisión dos valores da igualdade e da non discriminación, xa que os discursos de odio non poden ter cabida nin amparo dentro da universidade pública.
 
Polo tanto, esiximos que a USC aparte da docencia ao profesor Luciano Méndez, que como institución acepte calquera medida en relación co caso que a alumna discriminada decida, e o cese de medidas disciplinarias contra o alumnado consciente que denunciou esta situación.
 
Folla recollida de sinaturas