O goberno central decreta a devolución da paga extra de 2012 (a única que as traballadoras e traballadores desa administración se lles requisou), procedendo a Xunta mediante anuncio publicado no DOG do 4 de abril  a determinar, tamén, a súa devolución, esa restitución realizaríase en dous cómodos prazos, abril e setembro de 2016.
 
O goberno galego (o PP) non só nos confiscou a extra de 2012, desde ese ano embárganos o complemento específico das pagas extra pero, no ano 2013, cometeu, outra vez a mesma ilegalidade que na paga extra de 2012 realizando unha apropiación do noso salario de xeito retroactivo (os Orzamentos publicáronse no DOG do 1 de marzo de 2013, roubándosenos a parte devindicada dos meses de xaneiro e febreiro). Despois de múltiples sentenzas, incluída a do Conflito Colectivo do PAS laboral desta universidade, o PP que goberna na Xunta acorda cos sindicatos maioritarios a devolución desa parte devindicada durante este ano, sen especificar data concreta, o acordo reflíctese na  LEI 7/2016. Na universidade sinalóusenos que a restitución realizaríase en outubro.
 
Agora ben, estamos en ano electoral e corresponde dar un caramelo co que edulcorar o roubo inmisericorde realizado durante todos estes anos. Feijoo, despois de decidir o adianto das eleccións autonómicas ao mes de setembro, toma a determinación de adiantar a restitución do ilegalmente roubado establecendo o abono, tanto do que queda por percibir da extra de 2012 como da parte devindicada dos meses de xaneiro e febreiro de 2013, nun único pago que as traballadoras e traballadores da xunta recibiron no mes de agosto. Dita, a tal efecto as instrucións e este anuncio.
 
Que Feijoo actúe deste xeito non é gratuíto, as traballadoras e traballadores aos que afecta esta miserable restitución (queda por devolvérsenos a práctica totalidade do incautado no ano 2013 e a totalidade dos anos 2014, 2015 e 2016) somos arredor do 4% do censo electoral, sendo a decisión unicamente electoralista. Ten un factor colateral  e é que deixa sen discurso aos sindicatos maioritarios que aceptan “sine die” a restitución desta mísera parte demostrándose que hai diñeiro e que se se nos mobilizase a restitución faríase de igual maneira.
 
Por outra parte a UDC, de vacacións, que nos saibamos non reclama á xunta o orzamento necesario para realizar o pagamento ao mesmo tempo que as nosas compañeiras e compañeiros da administración autonómica (na nómina do mes de agosto). Na reunión do día 30 de agosto coa Xerencia, a Xunta de Persoal manifestou o descontento por esta circunstancia e reclamou o pagamento na nómina de setembro, o xerente sinalou que os cartos se recibiran o xoves día 25 de agosto, coa nómina pechada o que imposibilitara o pago nese mes, realizarase, polo tanto, na nómina de setembro.