Á vista de que os prazos establecidos na convocatoria enviada ao DOG e que, segundo se nos sinalou, está previsto que se publique no do día 14 de setembro, fan que o pactado sexa de difícil cumprimento se non se aquilatan os prazos. Coa finalidade de axilizar o procedemento, a Xunta de Persoal convocou unha reunión para o luns 12 de setembro onde comezaremos a tomar decisións nos aspectos que atinxen á súa responsabilidade, neste caso a designación d@s representantes que lle corresponden nos tribunais, e pedirlle a mesma dilixencia á institución.
 
Lembramos os prazos
 
2. Solicitudes.
2.1. As solicitudes dirixiranse ao xerente da Universidade da Coruña no prazo de 20 días naturais que conta a partir do seguinte ao da publicación desta convocatoria no Diario Oficial de Galicia.
 
3. Listaxes de persoas admitidas e excluídas.
3.1. Tras rematar o prazo de presentación de solicitudes, no prazo dun mes, o xerente da Universidade ditará unha resolución en que declarará aprobadas as listaxes provisionais (neste caso o prazo establecido correspóndese ao tempo máximo que se pode tardar en publicar a dita listaxe).
As persoas aspirantes excluídas disporán dun prazo de dez días naturais, que conta a partir da publicación da referida resolución, para emendar o defecto que motivara a exclusión.
 
4 Tribunais
4.2. A composición dos tribunais cualificadores destas probas será publicada na Sede Electrónica da UDC cunha antelación de, polo menos, un mes respecto da data de inicio do exercicio.
4.5 Os respectivos tribunais terán a súa sesión de constitución cunha antelación mínima de dez días antes da realización do primeiro exercicio.
 
Outra cuestión urxente que ten a Xunta de Persoal enriba da mesa é o Concurso de méritos que, segundo o acordado, debería publicarse o día 1 de outubro e do que, a día de hoxe, non hai nada acordado coa Xerencia. A inexistencia de representación institucional fai que o cumprimento dese prazo perigue pero a Xunta de Persoal, na reunión do luns, 12 de setembro analizará a súa posición ao respecto da convocatoria e designación das persoas que a representarán no tribunal.