A intención principal é acordar entre todas as persoas asistentes as liñas de movemento que orienten o avance neste curso político e marquen o pulso ao poder institucional. "Derivar todos os nosos esforzos e recursos humanos cara a unhas estruturas viciadas, corruptas e de difícil transformación ten como consecuencia a desmobilización", explican desde a convocatoria.
 
Para quen organizan o encontro, a mobilización cidadá e o desborde son imprescindibles para exercer contrapoderes que equilibren o déficit democrático que a entrada nas institucións como o concello de Madrid non conseguiu reducir. "Ostentar o goberno municipal non supón ter o poder e o movemento na rúa segue sendo fundamental para exercer o contrapeso político", afirman.
 
Vivenda e pobreza enerxética
 
O obxectivo deste eixo no encontro será revisar os problemas máis perentorios e expor posibles solucións. Tamén se analizarán os grandes retos a futuro que deberán controlar as políticas municipais e autonómicas para que deixen de ser o soporte da especulación inmobiliaria, e reconduzan os seus obxectivos e propostas cara ás necesidades da cidadanía.
 
Remunicipalización
 
O debate sobre as distintas fórmulas de xestión do público e a participación cidadá en asuntos que lle competen directamente será obxecto doutra mesa no encontro. "A importancia deste debate non debe facernos esquecer que sen conseguir arrebatar a xestión ás empresas privadas, maiormente multinacionais, non poderemos abordar nas práctica ditas posibles fórmulas; aínda que non é menos certo que convén ir xerando consensos arredor dos tipos de xestión que nos parezan máis xustos e participativos", afirman
 
Urbanismo e mobilidade
 
Neste eixo de discusión, o obxectivo do encontro será acordar unha folla de ruta común entre colectivos e plataformas para traballar sobre ela dándolle continuidade no tempo, ampliando as alianzas con espazos críticos dentro das institucións e "utilizando os mecanismos de participación que a institución municipal está a despregar (foros locais, participación dixital, mesas sectoriais) ou de deslexitimalos cando así se considere (como no caso de Praza de España)".
 
Auditoría da débeda
 
En Madrid, o concello ten actualmente compromisos de pago por uns 4.700 millóns de euros, sendo así o municipio máis endebedado do Estado, grazas ás políticas das administracións anteriores do PP, chegando a un máximo de endebedamento de 7.733 millóns.
 
Os resultados están á vista de calquera: recortes nos servizos sociais; privatización do público; teito de gasto nas administracións públicas imposto pola lei Montoro; mentres que unha parte da poboación está en risco de pobreza ou sofre de pobreza enerxética; a precariedade; o desemprego, etc.

DIAGONAL PERIÓDICO