Estas organizacións lembran que as devolucións en quente, aínda coa entrada en vigor da última reforma da Lei de Seguridade Cidadá –que nunha das súas disposicións finais coaba a cobertura legal desta práctica–, requiren que se respecte “a normativa internacional de dereitos humanos e protección internacional da que España é parte”, como sinala a propia Lei de Seguridade Cidadá.
 
Tamén sinalan que a Defensora do Pobo emitiu varias recomendacións ao Ministerio de Interior nas que apunta a “necesidade de ditar unha resolución administrativa, con asistencia letrada e de intérprete, e indicación dos recursos que se poderán interpor contra ela”, e que se debe deixar constancia escrita diso, así como que se verificou que a persoa é maior de idade e non é vítima de trata de seres humanos.
 
O Consello de Europa tamén rexeitou en repetidas ocasións a práctica das devolucións en quente que realiza España, recomendando o cesamento na entrega de persoas inmigrantes ás forzas auxiliares marroquís, dado os malos tratos que estes inflixen ás persoas devoltas.
 
O comisario Dimitris Avramopoulos, en nome da Comisión e en resposta escrita do 25 de novembro de 2015 e 29 de xaneiro de 2016, expuxo que “o respecto do principio de ‘non devolución’ no contexto das operacións de retorno inmediato, como as aplicadas nas fronteiras exteriores de Ceuta e Melilla, pode garantirse se quen estean suxeitos ao retorno inmediato teñen a posibilidade, de feito e de dereito, de presentar unha posible petición de protección nun paso fronteirizo de fácil acceso”. Posibilidade que, segundo afirman desde estes colectivos, é de “imposible cumprimento coa aplicación desta práctica”.
 
Pola súa banda, o Tribunal Europeo de Dereitos Humanos (TEDH) admitiu a trámite nos últimos meses tres demandas de particulares que sufriron en primeira persoa estas prácticas por posibles vulneracións de Dereitos Fundamentais.
 
Diagonal Periódico