O BOE recolle hoxe unha sentenza do Tribunal Constitucional (TC) na que dá a razón a unha maxistrada que presentou recurso de amparo despois de que lle retirasen o complemento de destino por non tomar posesión do seu novo posto mentres estaba de baixa por maternidade. A sentenza establece que tratar as baixas de maternidade como o resto de licenzas ou permisos supón unha discriminación por razón de sexo.
 
A maxistrada estivo primeiro de baixa por embarazo de risco e, tras o parto, de baixa por maternidade. Durante ese tempo, en concreto durante a primeira fase, adxudicáronselle dous novos destinos e sumóuselle na nómina o complemento do primeiro de ambos. Pero, ao pouco tempo, recibiu un aviso polo que se lle retiraba ese complemento e que se lle ía a descontar o recibido ata entón. De feito, non cobrou ese complemento de destino ata que se reincorporou e tomou posesión.
 
A resolución baseábase en que o artigo 245 do Regulamento da Carreira Xudicial establece que o desempeño oficial no novo destino non empeza a contar ata que se finalicen licenzas, permisos ou vacacións. E que, por tanto, a maxistrada non debía cobrar ese complemento de destino ata que tomase posesión, efectiva, do novo posto.
 
Pero o TC considera, na súa sentenza, que esa decisión supón unha discriminación por razón de sexo e que non se poden equiparar as baixas por embarazo de risco e por maternidade, que só afectan as mulleres, con outro tipo de licenzas ou permisos. Ademais de lembrar as cláusulas da Lei de Igualdade entre homes e mulleres, establece que “a normativa […] non pode ser interpretada en relación con aqueles permisos e licenzas outorgados por razón de maternidade”.
 
“Con tal decisión, a Administración non atendeu aos principios do ordenamento xurídico que impoñen aos poderes públicos promover non só a igualdade formal, senón tamén a igualdade real e efectiva”, conclúe a sentenza, que anula as resolucións que lle retiraron o complemento de destino.
 
El BOE nuestro de cada día