A comezos de outubro produciuse un feito similar de maiores dimensións, coa fuga de 67 dos internos. O 30 de outubro, produciuse a fuxida de cinco persoas de orixe alxerina.
 
A organización Convivir sen Racismo pediu o día 15 á xuíza de control do CIE de Murcia e ao Defensor do Pobo que interveñan de maneira urxente no centro, que indaguen "nas razóns polas que de maneira reiterada se producen estas situacións e preveñan posibles actuacións lesivas de dereitos".
 
Esta organización presentou previamente unha queixa formal ante o xulgado de control do centro de Sangonera e, tras o episodio do 30 de outubro, unha petición ao Defensor do Pobo. "En ambas pedimos o peche destas instalacións, pois cada día que pase aberto supón máis sufrimento e é unha ameaza para a seguridade de todos os internos e de cantas persoas prestan o seu servizo neste centro".
 
No seu informe de 2016 publicado en setembro, SOS Racismo apunta os "malos tratos físicos e verbais" que se produce en Sangonera. Baseado no traballo de Convivir sen Racismo, o informe engade a práctica dos funcionarios do centro de propinar "golpes frecuentes en lugares onde as cámaras de vixilancia non chegan a gravar".
 
O medo a que unha denuncia dexenere en novos episodios de malos tratos, xunto co relativo pouco tempo que os internos pasan no CIE antes da súa posta en liberdade ou a súa expulsión do país, son os principais obstáculos, asegura SOS Racismo, á investigación deses episodios de violencia.
 
Unido a isto, prodúcense vulneracións de dereitos respecto da falta de transparencia e de dereito á información. "Non se permite a recepción de chamadas procedentes de familiares e avogados do exterior", explican desde Convivir sen Racismo.
 
Ademais, prodúcense deficiencias na atención sanitaria dos internos, dificultades para facilitar intérpretes para explicar os seus dereitos aos detidos no CIE, ademais de trabas para o acceso a roupa limpa ou alimentación suficiente.
 
Xunto a Convivir sen Racismo, organizacións políticas como Cambiemos Murcia ou Podemos pediron o peche deste centro. Andrés Pedreño, deputado de Podemos, declarou ao medio murciano Crónica del Pajarito que "os continuos motíns que se veñen desenvolvendo están a indicarnos que neste centro se vulneran as condicións mínimas para a convivencia armoniosa”.
 
Como noutros casos, sobre o CIE da pedanía de Sangonera la Verde pende a sospeita de que estea a funcionar sen licenza. Así o denuncia o partido de confluencia Cambiemos Murcia. Gabriel Vascónez, responsable de migracións de Cambiemos, declarou a Europa Press que "se o CIE de Sangonera non ten licenza, o Consistorio terá que informar ao Ministerio do Interior das posibles multas ás que terá que facer fronte", un motivo, para Vascónez, suficiente para "proceder ao precinto das instalacións".
 
Diagonal Periódico