A eles súmanse uns cuantos millóns de parados que non teñen prestación ou só un subsidio escaso: quen pillase os 707 euros en que quedará o Salario Mínimo Interprofesional (SMI) despois de que goberno e PSOE pactasen subilo un 8%.
 
Outras veces, no canto de suspiro é un roer de dentes: o dos mesmos seis millóns de infra-asalariados cando oen á ministra de Emprego dicir que en España “ninguén cobra por baixo do salario mínimo porque sería ilegal”. Seis millóns de "ningúns", aí están: un 34% do total de asalariados non chega ao SMI. Deles, máis de tres millóns e medio non cobran nin medio SMI, menos de 300 euros ao mes. E iso sen contar aos autónomos: para moitos “emprendedores”, cando descontan a cota da Seguridade Social queda un SMI pelado, ou nin iso.
 
O SMI é como o 120 km por hora en autovía. É ilegal correr máis, pero eu vou cravado a 120 e todo o mundo me adianta. Pois o mesmo o SMI: non se pode cobrar menos, pero ao meu arredor coñezo cada vez máis xente que non chega aos 600 euros ao mes, incluso traballando máis horas que ninguén.
 
E sen que salte ningún radar como na autovía: os empresarios teñen ao seu alcance mil e unha maneiras de converter o Salario Mínimo en Salario Máximo. A máis fácil é contratar a tempo parcial e logo non pagarche todas as horas extra que acabarás botando. Media xornada, medio soldo, e o resto by the face.
 
Pero non é a única maneira de pagar soldos de miseria: boten unha ollada ás ofertas de calquera portal de emprego e atoparán todo un catálogo de prácticas empresariais para afundir salarios: formación, prácticas, bolseiros, pago en especie, traballar a cambio de aloxamento, e o marabilloso mundo dos comerciais, co seu fixo máis comisións, ou sen fixo, a pelo. A selva do mercado laboral post-crise.
 
A ver, que me parece estupendo que suban o SMI, como non me vou a alegrar. E se no canto de 707 euros o sobe a 800 como  piden os sindicatos e como  aprobou o Congreso hai uns días, aínda mellor. Pero o problema para millóns de traballadores non se chama SMI, senón precariedade. De feito, a subida beneficiará sobre todo a quen ten mellores condicións laborais: quen aínda poden negociar colectivamente as súas condicións, pois moitos convenios sectoriais toman como base o SMI para calcular soldos.
 
Aínda que subisen o SMI a mil euros (aqueles soldos mileuristas de merda de antes da crise, lembran?), seguiría habendo millóns de traballadores para os que o Salario Mínimo será un inalcanzable Salario Máximo. E cada vez son máis: desde 2007 o número de traballadores que cobra por baixo do SMI aumentou a pesar de que a poboación asalariada total reducíase co paro. Óenos como suspiran hoxe? "Quen pillase eses 707 euros..."

Zona Crítica